18 сәу, 2020 сағат 12:26

Әлеуметтік төлем бізге үлкен қолдау болды - қызылордалық кәсіпкерлер

Қызылорда облысында төтенше жағдай салдарынан жұмысын уақытша тоқтатқан бірқатар кәсіпкерлер 42500 теңге әлеуметтік төлемге қол жеткізді, деп хабарлайды ҚазАқпарат.

Олардың қатарында Қызылорда қаласында мектептерде асхананы тамақ өнімдерімен қамтамасыз ететін кәсіпкер Роза Қадылкұрманова да бар. Кәсіпкер облыс орталығындағы №43, 136 мектептерде аталған жұмыспен айналысатын. 

«Төтеннен келген қауіпті індет барлық салаға кері әсерін тигізді. Еліміздегі, өңірдегі карантин кезінде біздің де тыныс-тіршілігіміз тоқтап қалды. Бұл сәтте мемлекет тарапынан табыссыз қалған қазақстандықтарға қолдау көрсетілуі зор қамқорлық деп түсінемін. Мен және өзіммен бірге жұмыс жасайтын ұжым мүшелері де аталған төлемге қол жеткізді. Осы орайда Мемлекет басшысына, Үкіметке, барлық жанашыр азаматтарға алғыс білдіремін. Еліміз бұл қиындықты тезірек жеңіп шығады деп сенемін», - деді кәсіпкер.

Қызылордалық тағы бір кәсіпкер Гауһар Қалымбетова да мемлекет тарапынан көрсетілген қамқорлыққа дән риза екенін жеткізді. Ол визажист кәсібімен айналысатын еді. Қазір ол жұмысы тоқтап тұр.

 

«Қиындық ешкімге де оңай соғып жатқан жоқ. Табыссыз қалған азаматтарға мемлекет тарапынан тиісті қолдау жасалды. Осы орайда халыққа берілген төлем көп отбасының мұң-мұқтажын шешуге оң септігін тигізді. Алдағы жарқын күндерде елімізде көптеген игілікті істерге жол ашылады деген үміттемін. Еліміз дамып, өркендей берсін», - деді ол. 

Төтенше жағдайда мұқтаж азаматтарға көрсетілетін әлеуметтік қолдау негізінде 98 мыңнан астам азаматқа төлем түскен.