23 жел, 2019 сағат 10:35

Алматыда Бибігүл Төлегенованың 90 жылдық мерейтойы өтті

Алматыда Социалистік Еңбек Ері, КСРО Халық әртісі, КСРО Мемлекеттік сыйлығының лауреаты Бибігүл Төлегенованың 90 жылдық мерейтойы салтанатты түрде атап өтілді, – деп хабарлайды «Ұлт ақпарат».

Абай атындағы мемлекеттік академиялық опера және балет театрына Бибігүл Төлегенованың туыстары, саяси және қоғам қайраткерлері, сондай-ақ мәдениет пен өнер өкілдері жиналды.

Бибігүл Төлегенованың 90 жылдығына арналған шығармашылық кешке ҚР Мәдениет және спорт министрі Ақтоты Райымқұлова да қатысып, жүрекжарды құттықтауын жеткізді.

«Әрдайым осылай абырой биігінде болыңыз, Сіз асқар шыңға шығудың, шыққан соң сол биікте мәңгілікке қалудың озық үлгісін көрсеткен біртуар талант иесісіз! Сіз тағдыр талайыңызда сан түрлі қиындықты көрген, қандай сәтсіздікті болсын парасаттылықпен, ақылмен еңсере білген кемеңгер аңыз адамсыз. Енді сол бейнетіңіздің зейнетін көріп, ортамызда жөн сілтер, бағдар берер ақылманымыз болып аман жүріңіз» деді Ақтоты Райымқұлова.

Қазақтың бұлбұлы атанған Бибігүл Төлегенованы Алматы қаласының әкімі Бақытжан Сағынтаев құтықтады.

«Бүгін — баршамыз үшін ерекше күн. Себебі өмірі өнерге, өнері өмірге айналған аяулы Бибігүл апайымыз қуанышын бізбен бөлісіп отыр. Қазақтың кәсіби ән өнері дегенде біздің ойымызға бірден Күләш Байсейтова, Роза Бағланова, Ермек Серкебаев және бүгінгі той иесі Бибігүл Төлегенова оралады. Табиғи таланты мен тынымсыз еңбегінің арқасында өнердің шыңына шыққан, халқының шынайы махаббатына бөленген Бибігүл апамызды осыдан 10 жыл бұрын Павлодар облысының әкімі болып отырған кезімде құттықтап, батасын алып едім. Бүгін ару Алматының сол кісіге деген ыстық ықыласын жеткізу бақыты тағы да маған бұйырып отыр. Мен үшін бұл ерекше қуанышты сәт. Бүгінгі той тұтастай қазақ өнерінің мерекесі. Той баршаңызға құтты болсын!» деді Бақытжан Сағынтаев.