21 мам, 2020 сағат 10:43

Ерлан Қарин саяси партиялар мен сайлау туралы заңға қатысты пікір білдірді

ҚР Президентінің кеңесшісі Ерлан Қарин Сенат қабылдаған саяси партиялар мен сайлау туралы заңға пікір білдірді, деп хабарлайды "Ұлт ақпарат".

«Бүгін Сенат саяси партиялар және сайлау туралы заңға түзетулерді қабылдады. Оған сәйкес, саяси партияларды тіркеу барысындағы кедергілер 2 есе қысқарады және партиялық сайлау тізімінде әйелдер мен жастарға 30 пайыз міндетті квота енгізіледі. Бұл өзгерістерге 2019 жылы желтоқсанда өткен Ұлттық кеңестің 2-отырысындағы саяси реформалар топтамасы аясында Президент Қасым-Жомарт Тоқаев бастама жасаған еді. Міне, бүгін осынау жаңа нормаларды сенаторлар мақұлдады», - деп жазды ол Facebook парақшасында.

Оның атап өтуінше, аталған нормалар байыпты саяси жаңашылдық саналады. Айталық, мәслихаттардағы 3 335 орынның тек 740-ында ғана әйелдер мандатқа ие болған. 

«Ал 29 жасқа толмаған жас депутаттардың саны - небәрі 53 қана. Сенатор Ләззат Сүлейменнің айтуынша, оның 44-і аудандық мәслихатта болса, облыстық мәслихаттарда мүлдем жоқ десек те болады. Сондықтан бұл нормалар әйелдер мен жастарды елдің қоғамдық-саяси процестеріне барынша кеңінен әрі белсенді тартуға септігін тигізеді», - деді Ерлан Карин.

Естеріңізге сала кетсек, бүгін Парламент Сенатының жалпы отырысында «Қазақстан Республикасындағы сайлау туралы» Конституциялық заңға толықтырулар енгізу туралы» Конституциялық заң мен «Саяси партиялар туралы» заңына өзгеріс пен толықтырулар енгізу туралы» заң қабылданды.