18 мам, 2020 сағат 17:36

Қазақстан қырғыз азаматтарының Ресейден транзит арқылы өтуіне рұқсат берді

Қазақстан қырғыз азаматтарының Ресейден транзит арқылы өтуіне рұқсат берді. Бұл туралы ҚР Сыртқы істер министрлігі таратқан ақпаратта айтылған, деп хабарлайды "Ұлт ақпарат". 

«Қазақстан Республикасының Сыртқы істер министрлігі Қырғыз Республикасы азаматтары үшін транзитті қамтамасыз ету мәселелері бойынша келесіні хабарлайды. Осы жылдың 17 мамырында Қазақстан Республикасының Сыртқы істер министрлігінің атына Қырғыз Республикасының Елшілігінен Ресей Федерациясынан Қырғыз Республикасының азаматтарын шығару үшін Қазақстан Республикасының аумағында транзиттік дәліз қамтамасыз ету жөнінде нота жіберілді.

Биылғы 18 мамырда ҚР Үкіметі жанындағы коронавирустың таралуына жол бермеу мәселелері жөніндегі ведомствоаралық комиссияның отырысында аталған өтінішке сәйкес, Ресей Федерациясының Орынбор облысында жүрген Қырғыз Республикасы азаматтары үшін Қазақстан Республикасының аумағында жолаушылар көлігін қамтамасыз ету шартымен байланыссыз көлік дәлізін ұсыну туралы оң шешім қабылданды. Қазіргі уақытта қырғыз тарапы көлікпен қамтамасыз ету мәселесін шешіп жатыр», - делінген министрлік таратқан ақпаратта. 

Осы орайда ҚР Сыртқы істер министрлігі қырғыз тарапына жан-жақты қолдау көрсететіндігін атап өтеді.