29 сәу, 2020 сағат 16:18

Жүк пойызымен қонаққа бармақ болғандар ұсталды – Ақтөбе облысы

Төтенше жағдай кезінде жүк пойызымен Ақтөбеден Қандыағашқа қонаққа бармақ болған 5 адам ұсталды. Бұл жайында ҚР ІІМ Көліктегі полиция департаментінен мәлім етті, деп хабарлайды "Ұлт ақпарат".

Төтенше жағдай кезінде теміржол көлігінің қозғалысына шектеу енгізілгеніне қарамастан, азаматтар түрлі жолдармен еліміз өңірлеріне сапарлауға тырысып жатады. Мәселен, Қандығаш стансасының желілік полиция бөлімінің қызметкерлері жүк пойызымен Ақтөбе стансасынан Қандыағаш стансасына (Ақтөбе облысының Мұғалжар ауданы) дейін бармақ болған 5 адамды ұстады. 

«Полиция қызметкерлері құқық бұзушылардың Қызылорда мен Ақтөбе облыстарының тумасы, жастары 23 пен 56 жас аралығында екендігін анықтады. Аталған тұлғаларға қатысты ҚР Әкімшілік құқық бұзушылық туралы кодекстің 476-бабы 6-бөлігі бойынша әкімшілік материал толтырылды», - деп атап өтеді ведомстводан.

Сондай-ақ көлік полицейлері Қарағанды-Жолаушылар стансасының теміржол вокзалы перронында қандай да бір құжатсыз жүрген Қарағанды және Жезқазған қалаларының екі тұрғынын ұстады. Қарағанды қалалық мамандандырылған ауданаралық әкімшілік сотының шешімімен екі азамат да әкшілік құқық бұзушылық жасады деп танылды және 2 тәулікке әкімшілік қамауға алынды.